Psalms 145

Ihubo lokudumisa. ElikaDavida.

1Ngizaphakamisa wena, Nkulunkulu wami iNkosi; ngizalidumisa ibizo lakho kuze kube phakade.

2Zonke izinsuku ngizakudumisa ngibabaze ibizo lakho kuze kube phakade.

3Umkhulu uJehova njalo ufanele kakhulu ukudunyiswa; ubukhulu bakhe kakho ongabulinganisa.

4Yileso laleso isizukulwane sizababaza imisebenzi yakho kwesinye; sizatshelana ngezenzo zakho ezinkulu.

5Sizakhuluma ngenkazimulo yakho ebenyezelayo ubukhosi bakho, lami ngizazidla ingqondo ngemisebenzi yakho emangalisayo.

6Zizalandisa ngamandla emisebenzi yakho emangalisayo, lami ngizafakaza ngemisebenzi yakho emikhulu.

7Bazakwenza umkhosi ngokulunga kwakho okunengi bahlabele ngentokozo ngokulunga kwakho.

8UJehova ulobubele lesihawu, uphuza ukuthukuthela ande ngothando.

9UJehova ulungile kubo bonke; ulesihawu kukho konke akwenzayo.

10Konke owakwenzayo kuzakudumisa, wena Jehova; abangcwele bakho bazakubabaza.

11Bazalandisa ngenkazimulo yombuso wakho bakhulume ngamandla akho,

12kuze kuthi bonke abantu bazi ngezenzo zakho ezinkulu lokubenyezela kwenkazimulo yombuso wakho.

13Umbuso wakho ungumbuso ongapheliyo, lobukhosi bakho bumi kuzo zonke izizukulwane. UJehova uthembekile kuzo zonke izithembiso zakhe njalo ulothando kukho konke akwenzayo.

14UJehova uyabaxhasa bonke labo abawayo abaphakamise bonke abacubayo.

15Amehlo abo bonke akhangela kuwe, wena ubaphe ukudla kwabo ngesikhathi esifaneleyo.

16Uyavula isandla sakho usuthise izidingo zakho konke okuphilayo.

17UJehova ulungile kuzo zonke izindlela zakhe njalo ulothando kukho konke akwenzayo.

18UJehova useduze kulabo abacela kuye, kubo bonke abacela kuye ngeqiniso.

19Uyagcwalisa izidingo zalabo abamesabayo; uyezwa ukukhala kwabo abasindise.

20UJehova uyabalinda bonke abamthandayo, kodwa bonke ababi uzababhubhisa.

21Umlomo wami uzakhuluma ngokudumisa uJehova. Akuthi izidalwa zonke zidumise ibizo lakhe elingcwele kuze kube nini lanini.
Copyright information for NdeIBE